Spalato

Spalato

Saturday, May 23, 2015

Posljednji mohikanac

More bit da san propuva, počea san timbravat ova slova. Jebiga svaki dan mi uleti nešto novo.

Pri neki dan trefin čovika za kojeg san mislija da je odavna umra? Doduše pokopali ga drugi, čakula krenila, prikrižija ga, kad ono uskrsnija prid menom.

Žila , ti si ??? A ne ti si, koji me ku*ac zajebavaš, sam dragi te Bog posla! Razumija san, vidin sidi na šentadi, nema pive. Oden do prve butige kupi jednu karlovčku! Znan san ča slidi ....tirade, pizdarije. Moram provest po ure s njim !

Bija je teško bolestan, škapula se, rikupera i odma udrija po pivi. Judi moji, cili mu život zapisan u očima. Ribarske ruke, svaka bora jema svoju štoriju ..i na glavi obavezna šilterica.

Stigla pivuša. Naravno i moja. Debata je mogla počet. Odma je krenija na šinjorine ča prolazidu pored njega ...eeee tek sad vidim, živ je !

Svaka dobra, nijedna nema mane. Samo ga jebe mikrolacija. Puno ih prođe pa ga ispizde. Razumija je da je dobro pogledat al počet mislit o njima neće na dobru završit.

Cili je svoj život provea na more a zadnjih godin je čistija ribu na peškariju. Tribali ste vidit kojon je brzinom čistija ribu na banku onim splitskim gospođama ča doma nisu tile šporkavat ruke ili sjebat nokte. Svaka mu čast, zna je ča in triba. Naravno, ka i svaki ribar, zna je i kako se sprema, tako da si moga dobit recept iz prve ruke. Na ribarski način ala Žila! Parilo je ka francuska spiza.

On vam je spada u kategoriju splitskih redikula. Nisan ga nikad tako doživija. Nije bija išempjan u glavu al nevolja ga natirala na nešto drugo . Omiljen čak u intelektualnom društvu, za ne virovat !!!

Pravi demokrata, sa svakim je moga jist i pit. Sidimo tako, prošli sve pokojnike. On je jedini još, jedan od onih, timbar i identiteta grada, po drugi put živ. Valjda je život odlučija tako jer i ta šentada na kojoj sidi jema smisla!! Bilo bi najbolje kad ode negdi gori napravit mu spomenik u obliku bove pa nek plovi…

Piva se bliži kraju. Molim za jedan snimak. Litretat fotoaparatom. Moran vazet još jednu pivu i malu votku, da seansa more počet. Udrija par fotki, zahvalija se živem čoviku. Nadan se da će mo jemat još puno ovakih čakula na njegovoj šentadi ...i liph pogleda...

Dok je pive bit će i ŽILE !

Evala mu bilo